#Durusika
Ushoga (homosexuality)ni
mwenendo wa kimapenzi unaokwenda tofauti na kawaida wanayofanya mwanaume na mwanamke, yaani kupendana na kuzaliana katika familia. Jinsia hizo
mbili zinalenga kukamilishana katika ndoa. Mungu baada
ya kumuumba Adamu alisema,
“Si vema mtu awe peke yake. Nitamfanyia
msaidizi wa kufanana naye” (Mwa 2:18). Umbile la mwanaume linaelekea kukamilisha na lile la mwanamke kiroho na kimwili. Lakini roho haionekani, hivyo ni rahisi zaidi kuona jinsi miili
yao inavyofaa kuungana iwe mwili mmoja. Hata hivyo tuelewe ya kuwa ukamilifu huo
unafanyika katika nafsi
ambazo zina vipawa tofauti vinavyowezesha kwa pamoja kukabili
vizuri maisha ya nyumbani, ya uchumi, ya siasa, ya dini n.k.
Mwelekeo
wa kimapenzi humaanisha muundo wa kudumu wa kimhemko, kimahaba na mivuto ya kimapenzi
kwa jinsia fulani. Mwelekeo wa kimapenzi kwa kawaida humfanya mtu kupenda
jinsia tofauti na ya kwake yaani, kuwa na mvuto kwa wahusika wa jinsia nyingine, jambo ambalo
linawezesha uzazi kadiri
ya maumbile. Hata hivyo kuna mashoga/wasagaji (mwanaume anayevutiwa na
wanaume/mwanamke anayevutiwa na wanawake), na watu wanaopenda jinsia zote mbili
(mwanaume au mwanamke anayevutiwa na jinsia zote mbili; kwa Kiingereza huitwa (bisexual).Mbali
na wale wasio na mwelekeo wowote wala kusikia mvuto wowote wa namna hiyo (kwa
Kiingereza huitwa (asexuals). Mwelekeo ukifuatwa unageuka tabia.
CHANZO
Vivutio
vya msingi ambavyo huunda mwelekeo wa kimapenzi wa watu wazima kwa kawaida
huibuka katikati ya utoto na kubalehe. Hakuna
makubaliano kati ya wanasayansi juu ya sababu halisi ambazo humfanya mtu kuwa na
mwelekeo wa kupenda jinsia ileile ya kwake au kupenda jinsia zote mbili badala
ya jinsia tofauti tu kama ilivyo kawaida. Wengi wanafikiria asili (biolojia) pamoja na mazingira vinachangia. Lakini mara nyingine ni kwamba mtu
ameathiriwa na tukio ambalo amefanyiwa hasa utotoni au amekubali mwenyewe
kujaribu kufanya na hata akazoea kiasi cha kushindwa kujinasua.
Kati
ya wale ambao wakati wa kubalehe wanayumba kwa muda fulani katika kujitambua,
wengi wao baadaye wanakomaa vizuri katika mwelekeo wa kawaida. Kumbe watetezi
wa ushoga wanataka hao vijana wapewe dawa za kusimamisha ubalehe ili baadaye
iwe rahisi kuwafanyia upasuaji wa kubadili viungo vya uzazi. Ukweli ni kwamba
suala si kila mtu kuamua awe wa jinsia gani, kana kwamba mwili hauna maana,
bali kujitambua na kujikubali alivyo.
Binadamu, akiwa na akili na utashi, halazimiki wala hapaswi kufuata mielekeo yake yote, bali
anatakiwa kuidhibiti, la sivyo ataharibika upande wa afya ya mwili na ya nafsi vilevile. Mbali ya kuharibu maisha ya jamii,mfano, mtu anaweza kuwa na mwelekeo wa
kuwazini watoto wadogo,
mwingine wa kula kupita kiasi, n.k. Wakifuata mielekeo hiyo wataleta madhara
tu. Hivyo wafikirie kabla ya kufuata mwelekeo wowote na wazingatie maadili mema.
Watu
wana mang'amuzi tofauti juu ya mwelekeo wao wa kimapenzi. Baadhi wanajitambua
kwa muda mrefu kabla hawajaanza uhusiano na wengine. Baadhi hujihusisha na
vitendo vya kimapenzi kabla ya kujitambua na kuchukua msimamo juu ya mwelekeo
wao. Pengine mashoga, wasagaji na wapenda jinsia zote mbili hukumbana na unyanyapaa, na hata ukatili mkubwa kwa sababu ya mwelekeo wao wa kimapenzi tofauti
na kawaida. Wengi hubaguliwa kwenye shule, vyuo,
na sehemu zao za kazi,
wananyimwa huduma za afya na haki, na hupata msaada mdogo kutoka kwa wanafamilia na marafiki.
Ubaguzi na unyanyapaa hufanya iwe vigumu kujitangaza kuwa shoga, msagaji, au
mpenda jinsia mbili.
Wakati
hili ni tatizo la kimataifa, hali ni mbaya hasa katika sehemu kubwa za Afrika. Kituo cha Utafiti cha Pew mnamo mwaka 2007 kiligundua kuwa
3% tu
ya watanzania, wakenya, na waganda wanaamini kuwa ushoga unapaswa kukubalika. Hivyo
katika nchi zote wanachama wa jumuiya ya Afrika Mashariki (EAC), isipokuwa Rwanda, ngono ya
jinsia moja huchukuliwa kuwa ni uhalifu na pengine adhabu yake ni kifungo cha muda mrefu. Matokeo yake, ni
wachache tu walio wazi kuhusu mwelekeo wao wa kimapenzi, wakati wengi
wanalazimishwa kuishi kwa usiri na uwongo, ili waendane na maadili yaliyokubalika katika jamii yao.
Chuki dhidi ya mashoga, kwa Kiingereza (homophobia) ina
madhara makubwa kwa afya ya akili na ustawi wa watu walio mashoga, wasagaji na wapenda
jinsia mbili, hasa ikiwa wanajaribu kuficha mwelekeo wao wa kimapenzi.
Unyanyapaa na ukatili vinazidisha mafadhaiko waliyonayo tayari kutokana na kutambua tofauti iliyopo
kati ya mwili wao na mwelekeo wao. Mara nyingi wanashindwa kukabili hali hiyo
na kujikubali walivyo. Hivyo wako katika hatari ya kuingia ulevi wa aina mbalimbali kujiua kuliko wenzao wanaovutiwa na jinsia tofauti. Watu
wanaotamani kuwasaidia wanaweza kufanya kazi na mashirika husika
kuwapatia ushauri nasaha pamoja na kupambana na unyanyapaa.
Mashoga,
wasagaji na wapenda jinsia mbili wanaotaka kupunguza unyanyapaa wanaweza kuwa
wazi kuhusu mwelekeo wao wa kimapenzi, huku wakichukua tahadhari muhimu ili
kuwa salama kadiri iwezekanavyo. Kuwaambia watu wengine kuwa wewe ni mpenzi wa
jinsia moja au tofauti huitwa, kujitokeza. Mara nyingi hiyo ni hatua muhimu
ya kisaikolojia kwa
watu walio mashoga, wasagaji na wapenda jinsia mbili. Kati yao wanaohisi lazima
wafiche mielekeo yao ya kimapenzi huripoti wasiwasi wa mara kwa mara kuliko mashoga na wasagaji ambao wako
wazi. Japokuwa unapaswa kujitokeza ikiwa unataka na uko tayari. Ingawa
unatumaini kuwa marafiki na familia watakupokea na inawezekana kwamba
hawatakubali. Ikiwa unategemea wazazi wako kifedha, unaweza kutaka kungojea.
Inawezekana kwamba wanaweza kuguswa vibaya na kujaribu kukufukuza nyumbani,
kukuweka kwenye ndoa ya jinsia tofauti au kwenye matibabu mabaya ya kiakili.
Kama utajitokeza, ni vizuri kuanza kwa kumwambia mtu ambaye una uhakika kuwa
atakuwa na mtazamo chanya. Kujitokeza kunaweza kuwa moja ya kazi ngumu sana
utakayokabiliana nayo katika maisha yako, lakini pia inaweza kuwa moja ya kazi
zenye tunu sana. Kujitokeza ni njia mojawapo ya kuthibitisha hadhi yako na
hadhi ya watu wengine walio wasagaji, mashoga, na wapenda jinsia mbili.
KIAFYA
Miongo
mingi ya utafiti na
uzoefu ya kitabibu imepelekea mashirika ya afya na ya afya ya akili kuthibitisha kuwa mielekeo hii
si ugonjwa. Shirika la Afya
Ulimwenguni (WHO) liliondoa ushoga kutoka
kwenye orodha yake ya magonjwa ya akili mnamo 1990 na
kwamba mapenzi ya jinsia moja si magonjwa na hivyo hayahitaji matibabu. Hadi leo, hakuna utafiti wa kutosha wa kisayansi kuonesha
kwamba tiba inayolenga kubadili mwelekeo wa mapenzi ya jinsia moja
ni salama au inafaa. Kwa kuongezea, inaonekana kwamba uhamasishaji wa matibabu
ya mabadiliko huchangia mazingira mabaya kwa mashoga, wasagaji na wapenda
jinsia mbili.
Tafiti
tofauti kote ulimwenguni zimegundua kuwa mtu 1 hadi 10 kati ya 100
wanavutiwa na watu wa jinsia yao. Ushoga umekuwepo katika jamii na tamaduni nyingi, na pia hutokea katika spishi 500 hivi za wanyama.Jambo
hilo linatumiwa na watetezi wa ushoga kusema kwamba ni kawaida ya kimaumbile.
Lakini wanaosema kuwa ushoga ni kinyume cha maumbile wanamaanisha maumbile ya
binadamu yanayotakiwa kuongozwa na akili na utashi, si silika tu kama ilivyo kwa viumbehai wengine wote. Kwa mfano, ubakaji unafanywa na wanyama mbalimbali, lakini kwa binadamu
haufai kabisa.
Moja
ya dhihirisho la mapema zaidi ulimwenguni la ushoga kati ya watu ni michoro ya miambani ya Wasan wa Zimbabwe ambayo inaonyesha mahusiano ya jinsia moja ambayo ni
ya maelfu ya miaka iliyopita. Michoro hiyo na vilevile ushahidi mwingine wa kihistoria unaonesha kuwa ushoga umekuwepo
katika bara la Afrika katika historia yote, na si umeletwa
na mataifa ya Magharibi kama inavyodaiwa. Hata hivyo sasa ustaarabu wa Magharibi unahamasisha ushoga kwa mbinu zote katika kuhimiza
mienendo yoyote ya anasa isiyo na uwajibikaji kwa jamii. Katika kuwatetea umefikia pengine hatua ya
kuwafanya kielelezo cha maendeleo ambayo hatimaye yamejikomboa kutoka mitindo ya maisha
ya zamani na tunu zake, kama vile familia, uzazi n.k. Kwa namna hiyo unabomoa
misingi yenyewe ya maisha ya jamii. Pengine wenyewe wanatangaza mtindo wao kama
ndio bora na kudharau hiyo mingine (k.mf. maandamano ya "Gay Pride").
DINI
Tamaduni
za kijamii au za kidini hazitakiwi kuhalalisha tena ubaguzi dhidi ya mashoga,
wasagaji na wapenda jinsia mbili. Uonevu na unyanyasaji, kuwakatalia watu walio
wasagaji, mashoga, na wapenda jinsia mbili fursa na heshima sawa au kuwatuhumu
kwa vile walivyo au wanavyotenda si uchaji wa Mungu wala ufuataji tamaduni bali ni ubaya tu. Kuchukia
maovu ni tofauti na kuchukia mwovu. Hata hivyo suala la maadili linabaki: je,
ni halali kufuata mwelekeo wowote ambao tunajisikia au tumejizoesha kwa
kurudiarudia matendo maovu? Tukikubali watu wafanye lolote wanalojisikia, jamii
itakuwaje?
Uyahudi, Ukristo,
na Uislamu kimapokeo huchukulia
tabia za mapenzi ya jinsia moja kuwa ni dhambi. Mafundisho ya Uhindu, Ubudha, Ujain, na Usikh hayako wazi kabisa juu ya mwelekeo wa mapenzi ya
jinsia moja, na viongozi wa dini wanatoa maoni tofauti. Leo,baadhi madhehebu wanazidi
kukubali mapenzi ya jinsia moja, na hata ndoa ya jinsia moja. Idadi inayokua
ya madhehebu ya Uprotestanti hufanya baraka za ndoa za jinsia moja. Watu wengi walio mashoga,
wasagaji na wapenda jinsia mbili wanaripoti kwamba hawaoni mgongano kati ya
mwelekeo wao wa kimapenzi na imani yao. Hayo yote hayamaanishi kwamba ndio ukweli; pengine ni kupotewa na hekima au ni kujilegeza na kufuata tu mkondo. Ni lazima
kufikiria uumbaji wa
mtu katika jinsia mbili ili kuelewa Muumba alitaka nini, hasa alipounganisha kilele cha tendo
la ndoa na uwezekano wa mimba kupatikana.
Hivyo
mashoga na wengineo wanahitaji msaada wa pekee kuelewa mpango wa Mungu kuhusu
jinsia na hatimaye kuishi namna ya kumpendeza. Msimamo wa Waorthodoksi na Waorthodoksi wa Mashariki ni wa namna hiyohiyo: kwamba ngono inakubalika tu
katika ndoa.
Zuia
kitendo hicho,hakifa.
Maoni
na ushauri ni hapa,,,,
+255767611645
+255715080716
Adamgome96@gmail.com
No comments:
Post a Comment